Personar som vil vere dyrehelsepersonell (veterinærar, fiskehelsebiologar og dyrepleiarar) i Noreg, må ha autorisasjon eller lisens (avgrensa autorisasjon) frå Mattilsynet. Kvalifiserte EØS-borgarar som oppheld seg mellombels i Noreg, kan arbeide som dyrehelsepersonell utan norsk autorisasjon.

Du må søkje for å bli autorisert. Mattilsynet skal ha melding om mellombels arbeid.
 
Personar med fullført utdanning frå Noregs veterinærhøgskule, Universitetet i Bergen eller Universitetet i Tromsø får autorisasjon.
 
Kvalifiserte EØS-borgarar får også som hovudregel autorisasjon. Personar med utdanning frå land utanfor EØS må ta tilleggsutdanning for å kunne få autorisasjon eller lisens.
 
Vidarekommande veterinærstudentar kan få lisens til å utføre assistentteneste.
 
Tap av autorisasjon
Dyrehelsepersonell mistar autorisasjonen ved fylte 75 år, men har framleis rett til å bruke tittelen. Mattilsynet kan vedta at dyrehelsepersonell som er uskikka til å utøve yrket eller som trosser åtvaringar frå Mattilsynet, skal miste autorisasjonen eller lisensen.